Flott sesongopning på Vinterkarusellen

Det vart mange gode tider og ikkje minst ny løyperekord på sesongens fyrste løp i karusellen.

Bilete: David Øygard, Edvin Øygard og Bjørnar Sandnes Lillefosse f.v.

Det var den tidlegare rekordhaldaren Bjørnar Sandnes Lillefosse som sette ny rekord. Han forbetra den gamle løyperekorden med over eit halv minutt.
Unggutane Håkon Myklebust Skjelnes, Rosendal, Edvin Øygard og David Øygard, begge Hålandsdalen, fulgte på plassane bak. Blant kvinnene var det Amalie Svåsand Måge og Torild Kveberg som var dei fyrste i mål.

Alt i alt var det ein kjempefin trimkveld der folk trimma og hadde det kjekt saman. Smittevernomsyna vart tekne på stort alvor, og m.a. breidda på startfeltet vart nesten firedobla i forhold til vanleg.

Til slutt dennekvelden vart det delt ut fleire gåvepremiar som arrangøren hadde trekt på startnummer. Den gjevaste; eit gåvekort på Mo Sport i Norheimsund på kr. 500,- vart vunne av Edvin Øygard frå Hålandsdalen. Bjørnar fekk ei fin påskjønning frå Strandebarm IL for dei to bronsemedaljane han tok under NM i Friidrett nettopp. M.a. sletta han Arne Risa sin nær femti år gamle kretsrekord på 10 000 meter. Bjørnar er no den ellevte raskaste mannen i Noreg på denne distansen gjennom tidene.