Vellukka avsklutning av årets Vinterkarusell

Tysdag 8. mars gjekk sesongens site løp i Vinterkarusellen. 50 deltakarar stilte til start på siste løpet.

Tre blide kvinner på Vinterkarusellen på kvinnedagen 8. mars 2022. F.v. Anne Fredheim Magnussen, Anne Christin Børsheim og Elisabeth Fosse.


Det var opplett og klart ver då sesongens siste løp vart avvikla. Som vanleg var det med folk i alle aldrar og det var god innsats frå alle. Løypa har vore uforandra i fleire år, med start og mål på Idrettsparken. Vendinga skjer på Midtre Børsheim åvom Strandebarmheimen. Der er ein akkurat halvvegs på den 4 km lange løypa.

Etter siste løpet har det vore vanleg å ha avslutningssermoni på Skulen. Denne var forenkla i år, og deltakarmedaljane vart delte ut rett etter målgang. Alle som har delteke, fekk medalje. Det var også mange premiar elles som var trekte blant dei som har vore med på årets karusell. Hovudpremien på kr. 2000,- til bruk på Mo Sport vart vunnen av Evita Lillefosse, som har vore med på dei fleste av sesongens løp. Håkon Myklebust Skjelnes frå Rosendal kom fyrst i mål. Han har vore fyrste mann på mange av sesongens løp. Tida denne kvelden vart 14,18. Neste mann var Ove Måge. Amalie Svåsand Måge og pappa Lars sprang ilag, og var dei neste inne. Like etter kom Torild Kveberg. Etter henne kom Monica Rinde Oma, som nok sette ny personleg rekord denne kvelden med den gode tida 18,50.

Arrangøren takkar alle som har delteke på årets karusell. Ein er særs glad for dei som møter fram også frå andre bygder og - kommunar, og me takkar sponsorar og støttespelarar. Takk skal de ha, alle! Neste arrangement frå Friidrettsgruppa vert seriestemne i fyrste del av mai.

Resultat sesongens sjette og siste løp i Vinterkarusellen tysdag 8. mars.