Ove`n med ny pers., Emma fyrst i mål igjen

Sesongens andre vinterkaruselløp vart eit kjempefint arrangement, med heile 86 trimmarar i sving i den milde novemberkvelden. Ove Måge sprang sitt beste karuselløp nokonsinne. Unge Emma Skjelbreid Poiree var fyrste kvinne i mål for andre gang denne hausten.

Deltakinga på denne sesongens vinterkarusell har vore den beste på mange år. Heile 86 startande trimmarar gjennomførte andre løpet i karusellen. Det var mildt ver, med litt lett yr inni mellom. I tillegg til deltakarar frå fleire delar av Kvam, har Hålandsdalen stilt med ein stor kontingent på løpa i år. Litt folk frå andre delar av Fusa var det òg. Dei som hadde reist lengst til løpet denne kvelden, kom frå Bergen.

Det var masse gode tider og prestasjonar. Også mange born gjer det svært godt i vinterkarusellen. Karusellen høver for alle uansett alder, nivå og ambisjonar. Det er trim og mosjon som står i høgsetet på dette arrangementet. Artig var det likevel at Ove Måge, som har utallige vinnterkaruselløp bak seg gjennom mange år, sette ny personleg rekord denne kvelden. Han kom inn på 13,58. Gratulerar ! Dag Joakim Storli frå Vikøy, kom inn sju sekund bak, etter eit flott løp. Bak følgde Knut Øystein Fosse og Bjarte Rød. 

Blant kvinnene var det igjen ungjenta Emma Skjelbreid Poiree som kom fyrst i mål. Slik var det også på det fyrste karuselløpet. På kveldens løp kom ho inn på 17,23. Ei flott tid for den unge Emma. Dei neste kvinnene i mål var Elin Rød og Torild Kveberg. På biletet øverst ser me Emma Skjelbreid Poiree og Ove Måge etter målgang. På biletet nedanfor er familien Svåsand Måge avbilda med mamma Silje og pappa Lars, saman med Sondre og Amalie. Nedst er Tor Henrik Fosse etter endt karuselløp. Dottera Kitti Marie vann ein av gåvepremiane som vart trekte etter løpet. Dei andre vann Ann-Marie Engevik og Håkon Berge. Hovudpremien på kr. 500,- til bruk på Mo Sport i Norheimsund, var det vesle Kaja Berge som vann.  

Det er kjekt for arrangøren at antal deltakarar er aukande på årets vinterkarusell. Karusellen er ei kjempemogelegheit for folk å halde seg i form. Det er enkelt for den einskilde å sjå sin utvikling gjennom karusellsesonge, sidan løypa er identisk heile tida. Men ver og føre kan sjølvsagt endra seg noko etter kvart. Resultatlista er sortert alfabetisk slik det er best på eit mosjonsløp. Alderen på deltakarane varierer frå under eitt år til langt uti syttiåara.